umukino wa Kaizer Chiefs na Zamalek muri CAF Confederation Cup uzasifurwa n'umunyarwanda

Umusifuzi mpuzamahanga w’Umunyarwanda, Uwikunda Samuel, yahawe gusifura umukino uzahuza Kaizer Chiefs ka Zamalek muri CAF Confederation Cup.

Mu cyumweru gitaha kuva tariki ya 22 Ugushyingo 2025, amakipe akomeye muri Afurika azatangira guhatanira mu mikino y’amatsinda y’iri rushanwa riri mu akomeye ku mugabane.

Kaizer Chiefs ikinamo Umunyarwanda Ntwari Fiacre ariko wagize imvune, izatangira ihura na Al Masry SC yo mu Misiri na yo ikinamo Umunyarwanda, Mugisha Bonheur. Ni umukino uteganyijwe tariki ya 23 Ugushyingo 2025.

Nyuma y’uyu mukino hazakurikiraho uzahuza Kaizer Chiefs yo muri Afurika y’Epfo na Zamalek SC na yo yo mu Misiri, ku wa 29 Ugushyingo 2025, kuri Peter Mokaba Stadium.

Impuzamashyirahamwe y’Umupira w’Amaguru muri Afurika, yatangaje abasifuzi bazasifura uyu mukino barimo Uwikunda Samuel umenyereye amarushanwa mpuzamahanga by’umwihariko ayo muri Afurika.

Si ubwa mbere agiye gusifurira amakipe yo muri ibi bihugu byombi, dore ko no muri Mata 2025, yasifuye uwa ¼ cya CAF Champions League wahuje Al Ahly na Mamelodi Sundowns. ‎

Biteganyijwe ko kandi Uwikunda azasifura imikino y’Igikombe cya Afurika cya 2025 kizabera muri Maroc kuva tariki ya 21 Ukuboza 2025 kugeza tariki ya 18 Mutarama 2026, aho azaba abaye Umunyarwanda wa mbere usifuye iri rushanwa inshuro ebyiri kuko yabikoze no mu 2023.