Burundi: Impunzi z’Abanye-Congo zirenga 40 zapfiriye mu nkambi imwe

Impunzi z’Abanye-Congo zirenga 40 ziherutse guhunga imirwano yabereye mu ntara ya Kivu y’Amajyepfo mu burasirazuba bwa Repubulika Iharanira Demokarasi ya Congo, zapfiriye mu nkambi y’agateganyo ya Gatumba mu Burundi.

Ku wa 18 Ukuboza 2025, Visi Meya wa Uvira uri mu bahungiye mu Burundi, Kifara Kapenda, yatangarije Abanye-Congo baba muri iki gihugu ko izi mpunzi zishwe n’indwara ya Cholera iterwa n’umwanda ndetse n’inzara.

Nk’uko Radio Okapi yabitangaje, Kifara yagize ati “Abantu umunani bapfuye ku wa 18 Ukuboza gusa, batanu bapfa ku munsi wabanje, muri rusange mu minsi 10 hapfuye abarenga 40 bitewe na Cholera n’inzara.”
Kifara yasobanuye ko inkambi y’agateganyo ya Gatumba yonyine harimo Abanye-Congo bagera ku bihumbi 30. Yasabye Leta ya RDC n’imiryango y’ubutabazi gufasha aba bantu kugira ngo badakomeza gupfa. 
Ishami ry’Umuryango w’Abibumbye rishinzwe impunzi (UNHCR) ryatangaje ko kuva tariki ya 5 kugeza ku ya 16 Ukuboza, u Burundi bwakiriye impunzi z’Abanye-Congo zirenga ibihumbi 82, zaturutse mu bice birimo Kamanyola, Luvungi, Katogota no mu Mujyi wa Uvira.

Izi mpunzi zari mu nkambi z’agateganyo zegereye umupaka zirimo iya Kansega, Gatumba, Cishemere, Makombe, Vugizo, Rumonge na Magara. Leta y’u Burundi yatangaje ko abazirimo barenze ubushobozi bwazo cyane.