Haravugwa umwiryane hagati ya perezida Ndayishimiye, Gen. Prime Niyongabo ndetse na bamwe mu bayobozi ba CNDD-FDD bapfa ifatwa rya Uvira
Perezida w’u Burundi, Evariste Ndayishimiye, amaze iminsi ahanganye n’Umugaba Mukuru w’ingabo, Gen Prime Niyongabo, biturutse ku mujyi wa Uvira wafashwe n’abarwanyi b’ihuriro AFC/M23 rirwanya ubutegetsi bwa Repubulika Iharanira Demokarasi ya Congo.
Abarwanyi ba AFC/M23 binjiye mu mujyi wa Uvira tariki ya 9 Ukuboza 2025, ku munsi wakurikiyeho batangaza ko bari kuwugenzura. Kuva uwo munsi, mu Burundi habaye inama nyinshi ziga ku hazaza h’umutekano w’iki gihugu n’intara ya Kivu y’Amajyepfo.
Umudipolomate w’Umubiligi ukorera mu Burundi yahishuye ko tariki ya 11 Ukuboza, Gen Niyongabo yayoboye inama yarimo abayobozi bo mu butasi n’abo mu ngabo zirwanira mu mazi hagamijwe gusuzuma uko umutekano wifashe imbere mu gihugu no ku mipaka yacyo.
Iyo nama yafatiwemo umwanzuro wo guhagarika ibikorwa by’ingabo z’u Burundi byo kurwanya AFC/M23 no kuzikura mu ntara ya Kivu y’Amajyepfo, mu burasirazuba bwa RDC.
Ndayishimiye yanze uwo mwanzuro, atsimbarara ku gitekerezo cyo kongerera imbaraga ingabo z’u Burundi no kugaba ibitero bikomeye kuri AFC/M23 kugira ngo zisubize umujyi wa Uvira.
Uyu Mukuru w’Igihugu yagaragaje ko yizeye ubufasha bw’u Bubiligi na Misiri, bwiyongera ku bufatanye n’ingabo za RDC, Wazalendo, Imbonerakure, umutwe w’iterabwoba wa FDLR n’abacanshuro baturutse muri Colombia n’u Burusiya.
Amasoko atandukanye avuga ko Ndayishimiye yagaragaje umugambi wo kwifashisha ikibuga cy’indege cya Bujumbura n’Ikiyaga cya Tanganyika mu kohereza ibikoresho bya gisirikare mu bice birimo Makobola, mu ntera y’ibilometero 20 uva mu mujyi wa Uvira.
Icyizere cya Ndayishimiye gikomoka ku nama yabereye kuri Ambasade y’u Bubiligi i Bujumbura tariki ya 10 Ukuboza, yahuje Ambasaderi w’u Bubiligi, uhagarariye ibikorwa bya gisirikare muri Ambasade n’abayobozi bo mu butasi bw’u Burundi, baganira banategura umugambi wo kwisubiza umujyi wa Uvira.
Mu gihe Ndayishimiye n’u Bubiligi bikomeje gushyigikira ko ibikorwa bya gisirikare byo kurwanya AFC/M23 bikomeza, Gen Niyongabo yarwanyije uwo mugambi ashingiye ku buryo ingabo z’u Burundi zatakarije bikomeye mu rugamba rwabereye mu kibaya cya Rusizi mu ntara ya Kivu y’Amajyepfo.
Mu nshingano ze nk’Umugaba Mukuru w’ingabo, Gen Niyongabo uvugana bihoraho n’abasirikare bari ku rugamba, atekereza ko u Burundi budakwiye gukomeza gutakaza ingabo mu ntambara itari iyabwo.
Si ubwa mbere hagati y’aba bombi hatutumbye umwuka mubi kuko muri Kanama 2025 na bwo byarabaye. Icyo gihe Gen Niyongabo yashyizweho igitutu ubwo yafunguzaga abofisiye bakuru bari bafungiwe muri gereza nkuru ya Mpimba.
Aba bofisiye bakuru bari bafunzwe hashingiwe ku ibwiriza rya Ndayishimiye, baziraga kwifashisha imodoka z’igisirikare mu bwikorezi bw’amabuye y’agaciro ava muri RDC, ibikomoka kuri peteroli n’ibitenge.
Gen Niyongabo amaze gufunguza aba bofisiye barimo Colonel, yabasubije muri Kivu y’Amajyepfo kuko na mbere yo gufungwa bari baroherejweyo kwifatanya n’ingabo za RDC, Wazalendo na FDLR.