Burundi: Ndayikengurukiye wabaye umuyobozi wa CNDD-FDD yatawe muri yombi

Uwahoze ari umuyobozi w’inyeshyamba z’Abarundi, Jean Bosco Ndayikengurukiye, wigeze guhunga kubera kurwanya manda ya gatatu ya Pierre Nkurunziza agasubira mu gihugu mu 2021, yatawe muri yombi ku wa Kane ajyanwa i Mpimba.

Araregwa gucuruza mu buryo butemewe lisansi mu Burundi bumaze amezi 56 ubuzima bwarahungabanye kubera ikibazo kitigeze kibaho cy’ibikomoka kuri peteroli.

Jean Bosco Ndayikengurukiye, yahunze u Burundi mu 2015 nyuma yo kunenga manda ya gatatu ya nyakwigendera Pierre Nkurunziza, ashinga ikindi gice cya CNDD-FDD kitavuga rumwe n’ubutegetsi mbere yo gutaha none kuva ku mugoroba wo kuri uyu wa Kane ushize arabarizwa muri Gereza ya Mpimba

Amakuru aturuka hafi y’iyi dosiye agera kuri SOS Medias Burundi avuga ko akurikiranweho kugurisha peteroli mu buryo butemewe. Nta makuru aturuka mu buyobozi ariko yatangajwe kuri iki kibazo.

Nubwo bivugwa ko hari abandi bantu bakurikiraniwe hamwe muri iyi dosiye, yajyanywe muri Mpimba wenyine, aho ndetse amakuru yemeza ko atigeze anyuzwa mu zindi kasho mbere yo kwimurirwa muri gereza yo mu murwa mukuru nk’uko bikunze kugenda.

U Burundi bwahuye n’ikibazo cyo kubura lisansi kimaze amezi 56, giherekejwe n’ibura ry’ibindi bicuruzwa byinshi. Kuva mu mwaka urenga, abafite ibinyabiziga n’abacuruzi benshi bajya muri DRC cyangwa Tanzaniya kugirango babone lisansi.
- Advertisement -

Ubushinjacyaha buvuga ko Ndayikengurukiye yagurishaga lisansi iva muri Congo. Abantu bafashwe bazira ibyo birego bashinjwa guhungabanya ubukungu bw’igihugu cyangwa guhungabanya umutekano.