Inter Miami yatangaje ko rutahizamu wayo Lionel Messi yagize imvune yo mu itako, ariko abaganga bataramenya neza igihe izamara, nubwo hari amakuru avuga ko ishobora kumara igihe kinini.
Kuri uyu wa Mbere, tariki ya 4 Kanama 2025, ni bwo Inter Miami yatangaje imiterere y’imvune ya kapiteni wayo, Lionel Messi. Ni imvune yagiriye mu mukino w’irushanwa rya Leagues Cup.
Muri uwo mukino bari bahuriyemo na Atlas yo muri Mexique, Messi yakinnye iminota 11, asohoka mu kibuga nyuma yo kugongana n’undi mukinnyi agahita avunika.
Inter Miami yatangaje ko raporo z’abaganga zigaragaza ko yagize imvune idakomeye cyane ku buryo yabagwa, gusa bitazwi neza igihe azakirira.
Yagize iti “Messi yatangiye kwitabwaho n’abaganga kugira ngo bavure imikaya ye yagize ikibazo mu mukino uheruka cyatumye asohoka utarangiye."
Inter Miami yakinnye na Necaxa yo muri Mexique idafite Lionel Messi, igorwa no kubona intsinzi kuko yayibonye kuri penaliti 5-4 nyuma yo kunganya ibitego 2-2.
Messi ntabwo azakina umukino ukurikira uzahuza ikipe abereye kapiteni na Pumas UNAM, ku wa Kane tariki ya 7 Kanama 2025.
Uyu mugabo w’imyaka 38, yari aherutse kumara igihe adakina mu rwego rwo kuruhuka. Messi kandi aherutse gutangaza ko kenshi asigaye akina afite uburibwe, bigahuzwa n’imyaka agezemo, itakimwemerera gukoresha umubiri we ibikorwa yahoze awukoresha mu myaka ishize.
