Perezida Evariste Ndayishimiye w’u Burundi yatangaje ko nta banga ry’imirwanire abo yise Inkotanyi barusha igihugu cye, ngo kuko hari igihe yigeze kumara icyumweru cyose arwanira na zo mu Burundi akazumutsa.

Ndayishimiye yabivuze mu cyumweru gishize ubwo yari mu masengesho yari yateguwe n’ishyaka CNDD-FDD.

Yavuze ko yarwaniye n’Inkotanyi ahitwa i Muruta mbere y’uko ngo zambuka zikajya muri Congo.

Ati: “Murabona aha bavuga ngo Inkotanyi? Inkotanyi twararwanye mu Burundi aha. Inkotanyi twararwanye, mbere y’uko bajya muri Congo twarwaniye hariya i Muruta. I Muruta twarwanye icyumweru cyose. Banganaga iki? Ni bo bahise bajya muri Congo kuko bambukiye hariya i Gihanga. Twarwanye icyumweru cyose.”

Bwana Ndayishimiye ntiyigeze avuga igihe nyacyo iyo mirwano yabereye, gusa yavuze ko byabaye ku butegetsi bwa Major. Pierre Buyoya wari witabaje Inkotanyi ngo zimufashe guhangana n’inyeshyamba za CNDD-FDD zari mu ntambara n’ingabo za kera z’u Burundi (FAB).

Amakuru avuga ko nyuma y’uko RPF-Inkotanyi yari imaze guhagarika Jenoside yakorewe Abatutsi mu 1994, Interahamwe zayikoraga ndetse n’ingabo za Ex-FAR zari zimaze gutsindwa urugamba zahise zihungira muri Zaïre, mbere yo gutangira gukorana na CNDD-FDD yatangiye kurwana na Leta yari iyobowe na Syilivestre Ntibantunganya waje guhirikwa ku butegetsi na Buyoya mu 1995.

Bivugwa ko imikoranire y’Interahamwe na Ex-FAR na CNDD-FDD yatumye RPF-Inkotanyi ifata icyemezo cyo guha ubufasha igisirikare cy’u Burundi, mu rwego rwo kwivuna iriya mitwe.

Ndayishimiye yavuze ko we na bagenzi be bongeye guhurira n’Inkotanyi muri Congo, ubwo CNDD-FDD yarimo icyura impunzi.

Uyu mugabo yavuze ko Inkotanyi zitarusha Abarundi kurwana, ngo kuko nta banga ry’imirwanire zifite batazi.

Ati: “Harya mwari muzi ko hari ibanga ry’imirwanire badafite tudafite ? Ntababeshye ntabwo kurwana baturusha kabisa! Ubu noneho baratuzi, no muri Congo bavuga ko iyo hataba twebwe baba barahafashe.”

Yunzemo ati: “None abantu twarwanye njyewe nta ‘rockete’ cyangwa ‘mortier’ mfite tukabumutsa, uyu munsi dufite ibikoresho bikwiye, dufite n’ubusugire badukanga? Sha nibaze barebe!”

Ndayishimiye aravuga ko yarwaniye n’Inkotanyi mu Burundi akazitsinda, mu gihe amakuru avuga ko CNDD-FDD yafashe igihugu biciye mu masezerano ya Arusha, nyuma yo kunanirwa gufata agace na kamwe mu myaka yose yamaze irwana na Leta.