Imirwano ikaze yatangiye mu rukerera rwo kuri uyu wa Gatatu, itariki 1 Mata, mu mujyi wa Shoa, uherereye mu Murenge wa Osso Banyungu wo muri Teritwari ya Masisi, Intara ya Kivu y’Amajyaruguru, mu burasirazuba bwa Repubulika ya Demokarasi ya Congo. Imirwano yahuje AFC/M23 n’inyeshyamba za Wazalendo.

Nk’uko amakuru menshi ava muri ako gace abitangaza, ngo urusaku rw’intwaro ziremereye n’izoroheje rwumvikanye kuva mu gitondo cya kare, ibintu bikaba bikomeje kuba urujijo kandi biteye impungenge zikomeye mu baturage b’abasivili bo muri ako karere.

Nk’uko ayo makuru agera ku rubuga rwa ACTUALITE.CD rubogamiye kuri Leta ya Kinshasa avuga, ngo iki gitero cyagabwe n’inyeshyamba za AFC / M23 zishaka kongera kugenzura aho hantu h’ingenzi.

Ngo iki gitero ni kimwe mu ngamba zagutse za AFC/M23 zo kwagura akarere igenzura muri Masisi.

Kugeza ubu, nta mibare y’abapfuye cyangwa ibyangiritse. Icyakora, imirwano yongeye kwiyongera iratera ubwoba bw’uko abaturage bongera guhunga ku bwinshi muri kariya karere ka Kivu y’Amajyaruguru, gasanzwe karajahajwe n’amakimbirane akoreshwamo intwaro.