Indege ebyiri z’igisirikare cya Amerika zahanukiye mu Burengerazuba bwa Iraq, imwe ishinzwe kongerera amavuta indege z’intambara irashwanyagurika mu gihe indi yabashije kugera ku butaka neza.

Indege yitwa KC-135 ishinzwe kongera amavuta mu zindi ziri mu kirere ni yo yashwanyutse, gusa ntihatangajwe umubare w’abaguye muri iyi mpanuka.

Amakuru avuga ko iyi ndege ikoreshwa n’abantu batatu barimo umupilote n’umwungirije hamwe n’ushinzwe ibikorwa byo kongera amavuta mu ndege ziri mu kirere zigenda, kugenzura imitwaro zikoreye no kugenzura abagenzi.

Ingabo za Amerika zirwanira mu Kirere zatangaje ko iyi ndege itahanuwe n’ibitero by’intambara cyangwa ibihugu by’inshuti byibeshye bikayirasaho. Ntihatangajwe n’ubutumwa yari yagiyeho.

Ni indege kandi yashoboraga kwifashishwa mu gutwara inkomere n’abarwayi bakaba bahabwa ubuvuzi mu gihe berekezwa ku bitaro.

Forbes yanditse ko iyi ndege ya KC-135 ifite agaciro ka miliyoni 79$ ugendeye ku gaciro k’ifaranga k’uyu munsi kuko ku rubuga rw’ingabo za Amerika zirwanira mu kirere hariho ko yaguzwe miliyoni 39,6 $ mu 1998.

Itwara amavuta apima ibilo ibihumbi 90 ishobora guha izindi ndege.

Umutwe witwaje intwaro witwa Islamic Resistance wo muri Iraq bivugwa ko ufashwa na Iran watangaje ko warashe indege ebyiri za Amerika zishinzwe kongerera izindi amavuta, mu rugendo rwo kurengera ubusugire bw’igihugu cyabo.

Reuters yanditse ko abantu batandatu ari bo bari muri iyi ndege.